Ciidamada Amniga Puntland oo hawlgallo ka wada magaalada Boosaaso ayaa qabtay xubno lagu tuhunsan yahay in ay ka tirsan yihiin firxadkii mileeshiyaadka Daacish ee ka soo cararay togga Baallade.
Xubnaha ciidanku qabtay oo isu ekeysiiyay dad reer miyi ah ayaa isku dayay in ay si dhuumasho ah ku soo galaan Boosaaso waxaase gacanta lagu dhigay ka hor inta aysan bulshada dhex galin siday sheegayaan saraakiisha ciidamada ee ku sugan Boosaaso.
Shakhsiyaadka lagu tuhunsan yahay mileeshiyaadka Daacish ee ciidamadu qabteen ayaa loo dhaadhiciyay xabsiga Boosaaso waxaana baaritaan ku wada waaxda baarista u qaabilsan Booliska ee C.I.A si loogu gudbiyo laamaha garsoorka.
Ciidamada Ammiga Boosaaso ayaa dhawaanahan laba jibbaaray hawlgallada ka socda gudaha Boosaaso ee lagu xaqiijinayo Amniga gaar ahaanna kuwa looga hortagayo firxadka mileeshiyaadka Daacish ee ka soo cararay goobaha dagaalka.
