Dowladda Ukraine ayaa raadin badan ugu jirtay sidii loogu caawin lahaa diyaarado dagaal gaar ahaan kuwa casri ah, si ay ugula dagaalamaan ciidamada Ruushka ee duullaanka kusoo qaaday dalkaasi .
Mareykanka iyo xulufadiisa reer Galbeedka ayaa Ukraine ku taageeray hub iyo agabyo kale oo dagaalka muhiim u ah, waxa ayna mar kale doonayaan in ay ku taageeraan hub casri ah si u xoojiyaan ciidamada Ukraine.
Dowladda Mareykanka ayaa sheegtay in uu u ogolaan doono xulafadiisa reer galbeedka in ay siiyaan Ukraine diyaarado dagaal oo casri ah, oo ay ku jiraan diyaaradaha Mareykanka ee F-16, taas oo xoojin doonto Kyiv.
Lataliyaha Amniga Qaranka Jake Sullivan ayaa sheegay in Madaxweyne Joe Biden go’aankan dowladda Ukraine loogu oggolaaday in la siiyo diyaaradaha F-16 ku war-galiyay madaxda dalalka G-7 ee shirka uga furmay Japan.
Jake Sullivan ayaa sidoo kale sheegay in ciidamada cirka Mareykanka tababar siin doonaan ciidamada Ukraine si ay u adeegsadaan diyaaradahan casriga ah ee F-16, waxa uuna xusay in diyaaradahan wax badan u tari doonaan milatariga Ukraine.
Madaxweynaha dalka Ukraine Volodymyr Zelensky ayaa guul ku tilmaamay go’aankan loogu oggolaaday diyaaradaha casriga ah , waxa uuna xusay in muddo dheer raadinayeen helitaanka diyaarado dagaal oo casri ah si duullaanka Ruushka isaga difaacaan.
Xafiiska Shabakada Allbanaadir.com
Muqdisho Somalia
Allbanaadir@live.com
