Rag burcad ah oo dhac u geysanayey shacabka ayaa xalay lagu qabtay degmada Wadajir ee magaalada Muqdisho.
Taliska Ciidanka Boliska gobolka Banaadir oo qoraal kooban soo saaray ayaa sheegay in burcadan oo ka koobnaa labo nin ay ku hubeysnaayeen qoryo.
“Caawa 22/4/2023 abaaro 10:25pm waxay gacanta ku soo dhigeen Ciidanka Boliiska Saldhiga wadajir labo nin burcad ah kuwaasoo ku howlanaa falal burcadnimo, iyagoo ku hubeysnaa Qori Ak 47 iyo qori faal ah” ayaa lagu yiri qoraalka Booliska.
Labada nin ee burcada ah ayaa magacyadooda lagu kala sheegay Cabdiraxiin Aaran Cabduqadir oo ka tirsan ciidanka Xoogga dalka & Abshir Cali Nuur oo aan la sheegin inuu ciidan ahaa iyo in kale.
“Waxaa la horgeyn doonaa Cadaalada” ayaa lagu soo gebagebeeyey qoraalka ka soo baxay Taliska Ciidanka Boliska gobolka Banaadir.
Burcada dhaca u geysata shacabka ayaa mudooyinkan ku soo badanayey xaafadaha magaalada Muqdisho, kuwaasoo qaarkood ay gacanta ku soo dhigeen ciidamada amaanka dowlada.
Xafiiska Shabakada Allbanaadir.com
Muqdisho Somalia
Allbanaadir@live.com
