Magaalada Khartuum ee caasimadda dalka Sudan waxaa ka socda dagaal xooggan oo u dhaxeeya ciidamada milatariga Sudan iyo ciidamo awood badan oo gurmadka deg dega bixiya oo loo yaqaan RSF.
Ciidamada ayaa ku dagaalamayay xarumo muhiim ah oo kuyaalla magaalada Khartuum, waxaana dagaalka labada ciidan u dhaxeeya la isku adeegsanayaa hub culus, waxaana sidoo kale la sheegayaa in dagaalka qeyb ka yihiin diyaarado dagaal.
Saraakiil u hadashay ciidamada RSF ee dagaalka kula jira milatariga Sudan ayaa sheegay in dagaal kula wareegeen qasriga madaxtooyada Sudan, guriga taliyaha ugu sareeya milatariga Sudan iyo sidoo kale garoonka diyaaradaha magaalada Khartuum.
Goobjoogayaal ku sugan caasimadda Khartuum ayaa soo sheegaya in ay maqlayaan dhawaqa rasaas culus ayna arkayaan qiiq iyo uuro ka baxaya qeybo kamid ah magaalada Khartuum ee lagu dagaalamayo.
Dadka ku dhaqan magaalada Khartuum ayaa qaarkood isaga carareen guryahooda, halka kuwa kalana ay go’doon ku yihiin kuna xiran yihiin guryahooda maadaama korkooda lagu dagaalamayo.
Dagaalkan ayaa saakay qarxay xilli maalmihii lasoo dhaafay magaalada Khartuum laga dareemayay saan saan colaadeed oo u dhaxeeya ciidamada milatariga iyo ciidamada gurmadka deg dega bixiya ee loo yaqaan RSF.
Xafiiska Shabakada Allbanaadir.com
Muqdisho Somalia
Allbanaadir@live.com
