Warbaahinta Israa’iil ayaa sheegtay in askar Israa’iiliyiin ah ay ku dhinteen kuna dhaawacmeen qarax ka dhacay dhismo ay ku sugnaayeen gudaha magaalada Rafax ee koonfurta Qaza.
Xarrumaha wararka ee Israa’iil ayaa sheegaya dhimashada hal askari halka kuwo kalena ay wali ku hoos jiraan burburka dhismaha kadib qaraxaasi, waxayna intaas ku dareen in ciidamada cirka Israa’iil ay direen diyaarado qumaatiga u kaca si ay uga soo daadgureeyaan askarta dhaawaca ah koonfurta Qaza una geeyaan isbitaalka Barzilai ee magaalada Asqalaan.
Sida ay sheegayaan isla ilo-wareedyadaasi, qaraxa ayaa lala beegsaday unug ka tirsan cutubka “Golani Brigade”, taasoo sababtay inuu burburo dhismuhu.
Goobjoogayaal ayaa sheegay inay jiraan dhimasho iyo dhaawacyo badan, iyo sidoo kale dad wali ku xayiran burburka dhismaha hoostiisa
Dhinaca kale, Shirkadda diyaaradaha ee Imaaraadka “Etihad” ayaa go’aansatay inay kordhiso tirada duulimaadyadeeda ay ku aadayso garoonka diyaaradaha “Ben Gurion” boqolkiiba 40% laga bilaabo bisha Diseembar ee soo socota .
Tirada duulimaadyada ayaa laga kordhin doonaa 20 jeer todobaadkii waqtigan xaadirka ah ilaa 28 jeer ilaa dhammaadka sanadka.
Go’aanka ayaa yimid xilli ay shirkado diyaaradeed oo caalami ah go’aansadeen inay joojiyaan duulimaadyadooda garoonka kadib weerarkii uga yimid Yemen”.
