Milateriga Mareykanka ayaa saakay qaaday weeraro dhinaca cirka ah oo ka dhan ah bartilmaameedyo ku yaal Suuriya, halkasa oo ay joogeen maleeshiyaad hubeysan oo shiico ah, kuwaa oo la sheegay in ay weeraro ku qaadeen saldhig Mareykanka ku leeyahay Suuriya.
Taliska dhexe ee Mareykanka (CENTCOM) , ayaa sheegay in weerarka dhinaca cirka ah ay qaadeen ciidankooda uu jawaab u ahaa weerarradii ugu dambeeyay ee ciidamada Mareykanka kala kulmeen maleeshiyaad xulufo la ah Iran.
Taliyaha CENTCOM, General Michael Erik Kurilla ayaa bayaan uu soo saaray subaxnimadii hore maanta oo Talaado ah ku sheegay in tallaabada militariga Mareykanka ay fariin cad u dirtay kooxaha hubeysan ee ay Iran taageerto ee ka howlgala Suuriya.
“Weerarada ka dhanka ah Mareykanka iyo xulafada isbaheysiga ee gobolka looma dulqaadan doono,” ayuu yiri Kurilla, isagoo ku sifeysay weerarrada lagu qaaday askarta Mareykanka ee Suuriya 24-kii saac ee la soo dhaafay inay ahaayeen “taxadir la’aan”.
Waxa uu intaa ku daray “Weeraradani waxay hoos u dhigi doonaan awoodda kooxaha ay Iran taageerto ee ah inay qorsheeyaan oo ay qaadaan weerarro mustaqbalka,” ayuu yiri taliyaha CENTCOM, isagoo intaas ku dartay in sagaal bartilmaameed oo laba goobood ah lagu weeraray weerarrada Mareykanka.
Maraykanka ayaa waxa uu ka joogaa ilaa 900 oo askari bariga dalka Suuriya , halka 2,500 oo kale oo ku sugan Ciraaq, kuwaas oo hawlgalkoodu yahay in ay caawiyaan ciidamada maxaliga ah ee dagaalka kula jira sidii looga hortagi lahaa in ay dib usoo laabtaan kooxda laga adkaaday ee Daacish.
Xafiiska Shabakada Allbanaadir.com
Muqdisho Somalia
Allbanaadir@live.com
