Dawladda Soomaaliya ayaa maanta xaqiijisay inay Hindiya la wadaagtay codsi la xiriira in safaaradda ay ku leedahay Muqdisho iyo qunsuliyadaha ay dalka ku leedahay in loo soo fasaxo bixinta dal ku galka Hindiya.
Arrintan ayaa ku soo aaday xili dhibaatooyin badan ay kala kulmaan muwaadiniinta Soomaalida ah ee caafimaadka iyo waxbarashada u taga dalkaas inay helaan dal ku galka Hindiya, iyagoo u safra safaaradaha India ee Nairobi iyo Addis Ababa
Wasiirka arrimaha dibadda Soomaaliya, Axmed Macallin Fiqi ayaa maanta sheegay inta uu ku sugnaa New York, inuu la qaatay kulan gaar ah dhiggiisa Hindiya, S. Jaishankar oo ay uga wadahadleen arrimo ay ka mid yihiin in dal ku galka Hindiya muwaadiniinta Soomaaliyeed lagu siiyo gudaha dalkaas
Arrintaa ayuu Ambadasor Fiqi sheegay inuu rajo badan ka qabo waqti dhow in la arko.
Wasiirku wuxuu ka hadlay muhiimadda ah in la hagaajiyo adeegyada fiisaha ee muwaadiniinta Soomaaliyeed ee u socdaala Hindiya, gaar ahaan kuwa Waxbarashada, daryeelka caafimaadka, iyo ganacsiga.
