Madaxweynaha dowlad goboleedka Hirshabeelle mudane Cali Cabdullaahi Xuseen (Cali Guudlaawe) oo ayaa maanta kulan gaar ah la qaatay golaha deegaanka cusub ee degmada Jowhar ee xarunta maamulka Hirshabelle.
Kulanka ayaa waxaa ka qeyb galay Wasiirka Wasaaradda arrimaha guddaha iyo dowladdaha hoose, guddoomiyaha gobalka Shabeellaha dhexe, guddoomiyaha degmada Jowhar iyo dhammaan xubnaha golaha deegaanka.
Madaxweyne Cali Guudlaawe ayaa dhageystay warbixinta golaha deegaanka cusub ee degmada Jowhar oo isugu jirtay wixii u qabsoomay muddada kooban ay shaqeenayeen iyo caqabadaha ku hor-gudban.
“Degmada Jowhar inay yeelato gole deegaan muhiimad gaar ah ayay ii laheyd waxaan rajeynayaa inaad wax badan beddeshaan. Dhammaan qoddobadii aan ka wada haddalnay waa ay dhaqan-galayaan.” ayuu yiri Cali Guudlaawe.
Ugu dambeyn madaxweynaha Hirshabeelle Cali Guudlaawe ayaa amray golaha deegaanka ee degmada Jowhar inay qabtaan tartan nadaafaddeed oo lagu tartansiinayo waaxyaha ay ka kooban tahay degmada Jowhar.
Xafiiska Shabakada Allbanaadir.com
Muqdisho Somalia
Allbanaadir@live.com
