Ra’iisul Wasaaraha Xukuumadaa Federaalka Soomaaliya mudane, Xamsa Cabdi Barre ayaa hambalyo u diray Mudane Dr. Axmed Cawad bin Mubaarak oo maanta loo magacaabay Ra’iisul Wasaaraha cusub ee dalka Yemen.
Ra’iisul Wasaaraha Xamsa ayaa Ra’iisul Wasaare Cawad Alle ugu rajeeyay hoggaamin wanaagsan iyo inuu shacabka aynu walaalaha nahay ee Yemen gaarsiiyo barwaaqo, xasillooni iyo horumar.
Waxaa uu sheegay in labada dal ay yihiin dalal deris ah oo wadaaga gacanka cadmeed, uuna ka dhexeeyo xiriir soo jireen ah oo loo baahan yahay in la sii xoojiyo.
Yemen ayaa sanadihii la soo dhaafay waxaa ka jirtay dowlad taag daran oo ay dhiseen xulafada uu sacuudiga hogaamiyo taasoo dagaal kula jirtay kooxaha Xuutiyinta Yemen ee Iran ay taageerto kuwaasoo maamula qeybo ka mid ah dalkaas oo ay ku jirto caasimada Sanca.
