In ka badan 1,500 oo qof ayaa ku dhintay illaa hadda kumanaan kalena way ku dhaawacmeen kadib dhulgariir weyn oo saaka waaberigii ku dhuftay Koonfurta iyo bartamaha Turkiga iyo waqooyi-galbeed Suuriya, kaasoo dumiyay guryo dabaqyo ah iyo burbur badan oo ku soo kordhay magaalooyinka Suuriya oo ay hore u burburiyeen dagaalo sannado socday.
Dhulgariirkan oo cabirkiisu ahaa 7.8 magnitude, oo gelinkii dambe ee xalay ayaa kii ugu darnaa ee ku dhufta Turkiga qarnigan. Waxaa sidoo kale laga dareemay Qubrus iyo Lubnaan. Waxaa xigay galabnimadii hore dhul gariir kale oo weyn, cabirkiisuna yahay 7.7.
Ilaa hadda ma cadda inta uu la egyahay khasaaraha uu geystay dhulgariirkii labaad, sidoo kale waxaa laga dareemay guud ahaan gobolka, iyadoo shaqaalaha gurmadka ay la tacaalayeen sidii ay u soo saari lahaayeen khasaaraha ka dhashay burburka cimilada.
“Waxaa nala ruxay sidii sariir oo kale, guriga waxaan ku joognay sagaal, labo wiil oo aan dhalay ayaa weli ku jira burburka, waan sugayaa” ayay tiri haweeney gacanta ka jaban oo wejiga ka dhaawacantay, iyadoo ku hadlaysay ambalaas u dhaw burburka dhismo todoba dabaq ah oo ay ku noolayd magaalada Diyarbakir ee koonfur bari Turkiga.
Madaxweynaha Turkiga Tayyip Erdogan ayaa sheegay in 912 qof ay ku dhinteen, 5,383 ay ku dhaawacmeen, 2,818 dhisme ay ku dumeen Turkiga inkastoo uu khasaaruhu sii kordhayo saacadba saacada ka dambeysa
Erdogan ayaa sheegay in uusan saadaalin karin inta ay le’eg tahay tirada dhimashadu, iyadoo ay socdaan dadaallada gurmadka iyo baadigoobka.
“Qof walba waxa uu qalbigiisa iyo naftiisa gelinayaa dadaal inkasta oo xilliga jiilaalka, cimilada qabow iyo dhulgariirku inta lagu jiro habeenkii ay arrimuhu sii adkeeyeen,” ayuu yiri.
Muuqaal toos ah oo laga soo duubay Telefishinka dowladda Turkiga ee TRT ayaa muujinaya dhismo ku dumay gobolka koonfurta ku yaalla ee Adana kadib dhul gariirkii labaad. Ilaa hadda ma cadda in dhismaha laga saaray iyo in kale.
Dalka Suuriya oo ay horay u burburiyeen in ka badan 11 sano oo dagaal sokeeye ah, wasaaradda caafimaadka ayaa sheegtay in in ka badan 326 qof ay ku dhinteen 1,042 kalena ay ku dhaawacmeen. Waqooyiga-galbeed ee fallaagada Suuriya ay haystaan, samatabbixiyeyaashu waxay sheegeen in 221 qof ay ku dhinteen.
Diyarbakir, saxafiyiinta Reuters waxay arkeen daraasiin shaqaale samatabbixin ah oo baaraya tuulooyin burbursan, iyaga oo soo jiidaya xoogaa burbur ah kana raadinaya dad badbaaday. Mararka qaarkood waxay kor u taageen gacmahooda waxayna ku baaqeen aamusnaan, iyagoo dhegaysanaya dhawaaqyada nolosha.
“Waxaan ku soo toosnay sawaxan weyn iyo gariir daran. Waxaa dhacay laba dhul-gariir ka dib,” ayey tiri Meryem, 29, oo ka yimid koonfurta bari ee Turkiga magaalada Kahramanmaras, oo u dhow xuddunta.
“Aad ayaan u baqay, waxaan u maleeyay inaysan waligeed joogsan doonin, waxaan u soo qaatay waxyaabo qaar wiilkeyga oo hal sano jir ah” ayey intaas ku dartay.
Muuqaal lagu faafiyay barta Twitter-ka ayaa muujinayay labo dhismo oo daris ah oo midba midka kale ku soo dumay magaalada Xalab ee dalka Suuriya, waxaana ka buuxsamay dariiqa boodh aad u badan. Laba ka mid ah dadka magaalada oo uu dagaalku ka soo gaaray burbur xooggan, ayaa sheegay in dhismayaashu ay dumeen saacado ka dib dhulgariirka.
Xafiiska Shabakada Allbanaadir.com
Muqdisho Somalia
Allbanaadir@live.com
