Wararkii ugu dambeeyey ee naga soo gaaraya magaalada Jigjiga ayaa waxay sheegayaan in korontada, Biyaha iyo qadkii internetka laga jaray magaaladaas.
Talaabadan ayaa ka dambeysay rabshado xoogan oo magaalada ka dhacay manta kuwaasoo looga soo horjeeday ciidamada milateriga ee qabsaday xarumaha maamulka ee magaaladaas.
Dhinaca kale, ugu yaraan toban qof ayaa la soo sheegayaa iney ku dhinteen rabshadihii iyo boobkii maanta ka dhacay magaalada Jigjiga iyo magaalooyin kale oo ka tirsan dowlad degaanka Soomaalida Itoobiya.
Shan ka mid ah meydadkan ayaa yaala bartamaha iyo xaafado ka tirsan Magaalada Jigjiga, Waxaana dadka la dilay ay u badan yihiin dad ka soo jeeda qowmiyadaha kale ee Itoobiya.
Ciidamadii milateriga ee saaka la wareegay magaalada Jigjiga ayaa iyana la soo sheegayaa in dibeda looga saaray magaaladaas markii ay sii xoogeysteen rabshadaha looga soo horjeeday.
Waxaa yara degan xaalada magaalada Jigjiga inkastoo xiisad xoogan ay weli ka aloosan tahay, waxaana magaalada laga dareemayaa saameynta ka dhalatay dibad baxyadii rabshadaha watay ee saaka ka dhacay.
Xafiiska Shabakada Allbanaadir.com
Muqdisho Somalia
Allbanaadir@live.com Â
