Dowladda Iran, oo muddo dheer muujinaysay awood ciidan iyo sirdoon, waxaa si tartiib ah u wiiqay duruufo isbiirsaday oo gudaha iyo dibaddaba saameyn xooggan ku yeeshay. Waxaa dhacday in sirdoonno shisheeye, gaar ahaan kuwa Israel iyo Mareykanka, ay si sahlan u dhexgalaan nidaamka amni ee Iran, iyagoo bartilmaameedsaday saraakiisha ugu sarreysa iyo khubarada nuclear-ka. Arrimaha ugu waaweyn ee tan fududeeyey waxaa ka mid ah:
- Dagaallo aan Istaraatiijiyad Lahayn oo Daaliyey shacabka Iran.
Muddo ku dhow 40 sano, shacabka Iran waxaa lagu hayey xaalad dagaal iyo abaabul militari oo aan wax natiijo ah lagu gaarin. Waxaa loo adeegsaday halku-dhigyo maran oo kicin ah, balse aan lahayn aragti fog ama yool cad. Tani waxay dhashay niyad-jab guud, hoos u dhac ku yimid kalsoonida dadweynaha, iyo nuglaansho gudaha ah oo sirdoonada shisheeye ka faa’iideysteen.
- Isku Taagida Israel iyo Mareykanka Iyadoo Aan La Heysan Xulafo
Iran waxay si joogto ah u muujisay nacaybka ay u qabto Israel iyo Mareykanka taasoo ah gar maadaama ay cadawgeeda yihiin, balse waxay ku dhaqaaqday go’doon diblomaasiyadeed maadaama aysan sameysanin xulufo marka laga reebo jabhado ay iyadu abuurtay. Dhinaca kale, cadowgeeda waxaa garab taagnaa xulafo badan iyo xiriirro istaraatiiji ah oo ka faa’iideystay fursad kasta oo ay Iran ku liidato.
- Cunaqabateyn Dhaqaale oo Ba’an
Sanado badan oo cunaqabateyn adag ah ayaa burbur dhaqaale ku keenay Iran. Waxaa dhacday in:
Qiimaha lacagta waddanka uu si xowli ah hoos ugu dhaco, Sicir-barar xad dhaaf ah uu saameeyo nolosha dadka, Xaaladdan dhaqaale waxay abuurtey niyad-jab iyo caro shacabka ah oo ka dhan ah nidaamka talada haya, taasoo sababtay bay’ad ay sirdoonada shisheeye si sahlan uga hawlgalaan.
- Nacaybka Dadweynaha ee Rejiimka Khamenei
Kumannaan Iranian ah ayaa si fagaare ah u muujiyey nacaybka ay u qabaan nidaamka Khamenei, iyagoo dhigay mudaaharaadyo waaweyn oo looga soo horjeedo xukunka adag ee ruuxiga ah. Marka shacabka laftiisu uu noqdo mid aan u damqan jiritaanka nidaamka, waxaa sahlan in xogaha muhiimka ah ee sirta ay u furan yihiin cadowga dibadda.
Soo koobid:
Isbiirka culeysyada gudaha iyo go’doominta dibadda ayaa Iran ka dhigtay dal si sahlan loo dhex gali karo. Sirdoonada Israel iyo Mareykanka waxay si fudud u dhex mareen hay’adaha amniga iyo difaaca Iran, iyagoo dilal qorsheysan u geystay madaxda sare iyo saynisyahannada muhiimka ah ee la xiriira barnaamijka nuclear-ka. Markii kalsoonida shacabka la waayo, cunaqabateynna ay ragaadiso dhaqaalaha, dowlad kastaa waxay noqotaa mid nugul.
Iran waxey xifdin weysay xogeheeda sirdoon halka xuuti oo koox muqaawamo ah oo ay Iran taageerto ay 2 sano oo dagaal kula jirto USA, UK, Israel ay xifdiyeen siraha xogtooda .
Awooda ciidanka waxaa ka muhiimaan mida sirdoon.
