Madaxweynihii hore ee Soomaaliya Maxamed Cabdullaahi Maxamed (Farmaajo) , ayaa dhaliilay hannaanka loo maareeyey Gogosha Wadatashiga ee uu Madaxweynaha Soomaaliya Xasan Sheekh Maxamuud ku baaqay 1-dii bishan Juun.
Farmaajo , ayaa sheegay in cidda lagu martiqaaday iyo ajandaha guud ee la tilmaamay ee gogosha , intuba ay muujinayaan in madaxweynuhu uu wali ka leexanayo inuu si dhab ah u wajaho xaaladda siyaasadeed ee dalka ka jirta iyo culeyska ay leeyihiin arrimaha masiiriga ah ee khilaafaadku ka taagan yihiin.
”Sida aan marar badan ku talinnay arrimaha heshiiska siyaasadeed u baahan ee taabanaya masiirka shacabka Soomaaliyeed iyo nidaamka dowladnimada dalka waa mas’uuliyad wadareed ay tahay in talo-wadaag ay ka yeeshaan dhammaan heer Federaal iyo heer Dowlad-goboleed, si loo ilaaliyo midnimada dalka iyo wax wada-lahaanshaha dadka Soomaaliyeed, waxaase muuqata inuusan Madaxweynuhu wali garowsan arrintaas, uuna ku socdo siyasaasadda ku dhisan cidna loo joojin maayo” ayuu yiri Farmaajo.
Farmaajo ayaa sheegay in Madaxweynuhu uu u jihaystay dhabbe dalka gelinaysa qalalaase hor leh, waxaana taas marag uga dhigay hannaanka marti-qaadka Madaxweynaha oo ah mid aan ka jawaabayn arrimaha udub-dhexaadka u ah khilaafka taagan ee ay ugu waawayn yihiin wax-ka-beddelka dastuurka iyo arrimaha doorashooyinka, isaga oo hadda qorshaynaya wax-ka-beddel horleh oo sharci darro ah oo uu ku sameeyo 11-kii cutub ee ka badqabay dastuurkii heshiiska lagu ahaa.
Xafiiska Shabakada Allbanaadir.com
Muqdisho Somalia
Allbanaadir@live.com
