Barlamaanka dalka Iran ayaa markale ku celceliyay in Jamhuuriyadda Islaamiga ah aysan ka tanaasuli doonin xuquuqdeeda Nukliyeerka ee ku xusan heshiiska NPT, gaar ahaan xaqa ay u leedahay tayeynta Yuraaniyaamka, iyadoo diiday dalabaadka Mareykanka ee uu jeediyay wadahadalada dadban.
Warbixin ay Arbacadii soo saareen sharci-dajiyayaashu waxay tixraaceen hadalladii dhawaan ka soo yeeray madaxa gorgortanka Mareykanka Steve Witkoff iyo xoghayaha arrimaha dibadda Marco Rubio, oo sheegay in Iran aysan xaq u lahayn tayeynta Yuraaniyaamka iyadoo loo eegayo wax kasta oo bedeli kara heshiiskii nukliyeerka 2015.
“Annaga, xubnaha Golaha Wadatashiga Islaamka, annagoo ka jawaabayna sheegashooyinkan dhalanteedka ah iyo kuwa caqliga saliimka ah, waxaan cadeyneynaa in taliska Mareykanka uu ku socdo wadadii hoos u dhaca uuna ku jiro xaalad daciif ah oo jilicsan,” ayuu yiri barlamaanka Iran.
Iran waxay sheegtay inaysan marna ka tanaasuli doonin xuquuqdeeda, iyadoo Maraykanka ku tilmaantay mid fashilmay, taageero siiya kooxaha argagixisada isla markaana dhaqaale ka raadinaya cunaqabatayna caalamka.
