War cusub: Itoobiya iyo Somaliland oo dhamaystiraya heshiiskii is afgaradka

Masuuliyiinta Jamhuuriyadda iskeed ugu dhawaaqday madaxbannaanida ee Somaliland iyo dawladda Itoobiya ayaa ku dhow inay dhamaystiraan heshiis keeni kara in Itoobiya ay saldhig ciidan ka samaysato xeebaha Somaliland, isla markaana ay suurtogal tahay inay aqoonsato madax-bannaanida Somaliland, sida uu sheegay Dr. Ciisa Kayd, wasiirka arrimaha dibadda iyo iskaashiga caalamiga ah ee Somaliland

Wadahadalladan ayaa daba socda heshiis is afgarad ah oo afar bilood ka hor ay wada saxiixdeen ra’iisul wasaaraha Itoobiya Abiy Axmed iyo madaxweynaha Somaliland Muuse Biixi Cabdi.

Wasiir Kayd oo la hadlayey wargeyska Addis Standard ayaa sheegay in wada xaajoodyadu ay socdaan, waxaana la magacaabay guddiyo farsamo tan iyo markii la saxiixay. Si kastaba ha ahaatee, waxa uu daboolka ka qaaday in hawshaasi ay gaabisay bisha Ramadaan. Wuxuu kalsooni ka muujiyay in wada hadallada lagu soo gabagabeyn doono labada bilood ee soo socda.

Marka laga soo tago heshiiska saldhiga ciidamada badda, waxaa sidoo kale la sheegay in laga wadahadli doono suurtagalnimada in Itoobiya ay aqoonsato madax-banaanida Somaliland.

Wasiirka Maaliyadda Somaliland, Sacad Cali Shire, ayaa sheegay in aqoonsigaasi uu Somaliland u keeni karo cod caalami ah iyo fursado u furan maalgashi, ganacsi, socdaal iyo horumar. Waxa kale oo ay Somaliland u suurtogelin kartaa in ay wax ka amaahato hay’adaha maaliyadeed ee caalamiga ah sida uu yiri.

Haddii heshiis la gaadho, Itoobiya waxay kiraysanaysaa qayb ka mid ah xeebaha Somaliland si ay saldhig ciidan uga samaysato. Wasiir Kayd waxa uu xaqiijiyey in saddex meelood midkood ay suurtogal tahay in laga kireeyo Itoobiya balse waxa uu ka gaabsaday inuu shaaciyo ilaa inta laga soo gebagebaynayo wada-hadalada.

Heshiiska dhexmaray Somaliland iyo Itoobiya ayaa waxaa uu mucaaradad kala kulmay dowladda Federaalka Soomaaliya oo ku eedeysay Itoobiya inay isku dayeyso inay wiiqdo midnimada dhuleed ee Soomaaliya.

Kooxda Todobada ah ee G7 ayaa sidoo kale walaac ka muujiyay waxayna dhiiri galiyeen wadahadal dhexmara Soomaaliya iyo Itoobiya si loo xaliyo xiisadaha taagan.

- Advertisement -