Guddoomiyaha gobolka Banaadir Yuusuf Xuseen Jimcaale (Madaale) iyo Xildhibaano ka tirsan Baarlamaanka Soomaaliya ayaa Muqdisho ka ambabixiyay cutubyo ciidan loo diyaariyay in ay ku biiraan furimaha dagaalka ee lagu ciribtirayo kooxda Al Shabaab.
Ciidamadan furimaha dagaalka u baxay ayaa waxaa hogaaminaya qaar ka mid ah guddoomiyeyaasha degmooyinka iyo deegaannada gobolka Banaadir, waxa ayna ku biiri doonaan ciidamo kale oo furumaha dagaalka Shabeelaha Dhaxe ku sugan.
Guddoomiyaha gobolka Banaadir Yuusuf Xuseen Jimcaale (Madaale) ayaa ciidanka uu sagootiyay kula dardaarmay in ay qeyb ka noqdaan sifeynta Al Shabaab, isaga oo xusay in maamulka gobolka Banaadir iyo shacabka Muqdisho ay ka go’an tahay sidii ay u taageeri lahaayeen dagaalka ka dhanka ah Al Shabaab ee uu hormuudka u yahay Madaxweynaha Soomaaliya Dr. Xasan Sheekh Maxamuud.
Ciidamadan uu Duqa Muqdisho iyo xildhibaannada sagootiyeen ayaa kasoo jeeda beesha Daaúud Abgaal, waxa ayna qeyb ka noqonayaan howlgalka mar kale dib loogu xureynayo deegaannada beeshaasi degto.
