Wasaaradda Warfaafinta, dhaqanka iyo dalxiiska dowladda FS ayaa mar kale ku celisay digniin ku aadan faafinta dicaayadda Al-shabaab.
Wasiir ku xigeenka Wasaaradda warfaafinta, dhaqanka iyo dalxiiska dowladda FS mudane Cabdiraxmaan Yuusuf Al-cadaala oo shir jaraa’id ku qabtay Dhuusamareeb ayaa si adag uga hadlay dadka faafinaya fariimaha marin habaabinta ah ee ku saabsan dagaalka dowladdu kula jirto al-shabaab.
Waxaa uu xusay in dadkaas qaarkood ay si ula kac ah u faafinayaan dicaayadda wax uu ugu yeeray argagixisada, taasoo uu ku tilmaamay fal dambiyeed dowladdu kula xisaabtamayso cid walba oo ku kacda.
Dhinaca kale wasiir Al-cadaala ayaa xusay in hawlgalka al-shabaab looga sifaynayo Galmudug uusan waxba iska badalin, isla markaana uu ku socdo sidii dowladdu u qorsheysay.
Waxa uu ugu hambalyeeyey ciidanka xoogga dalka, daraawiishta Galmudug iyo ciidamada deegaankaba guulaha waaweyn ee ay todobaadyadii ugu dambeeyey ka soo hooyeen furimaha dagaalka.
