Afhayeenka Wasaaradda Gaashaandhigga Jeneraal Cabdulaahi Cali Caanood oo shir jaraa’id ku qabatay Magaalada Muqdisho ayaa digniin u diray shacabka ku dhaqan degmooyinka Ceelbuur iyo Galhareeri ee gobolka Galgaduud oo ay gacanta ku hayaan Al-Shabaab.
Caanood ayaa ugu baaqay shacabka labadaas degmo iney isaga baxaan, si aysan waxyeelo uga soo gaarin duulaanka ciidamada DF oo uu xusay inuu saacadaha soo socda bilaaban doono.
Waxaa uu sheegay in kumanaan askari oo ka tirsan ciidamada DF ay haatan dul hoganayaan labadaas degmo iyo degaanada hoos yimaada, ayna diyaar u yihiin iney qaadaan weerar daqiiqad kasta oo amar la siiyo.
Dhinaca kale Jen Caanood ayaa faahfaahin ka bixiyay howlgallo ciidamada dowladda ay ka fuliyeen degaanno katirsan Gobolada Shabeellaha Hoose, Sh/DFhexe iyo Galmudug.
Generaal Caanood ayaa sheegay in howlgallo lagu sifeynayo al-shabaab ay ka dhaceen degaanno hoos tago Ruun-nirgood, Hilowle Gaab iyo degaanno kale, isagoo intaa raaciyay in dhulka keymaha ah laga saaray Al-Shabaab, isla marekaana ay gacanta ku hayaan ciidamada xoogga dalka iyo kuwaa degaanka.
“Waxaa socda howlgal ka gaar ah kan ciidanka dhulka, waxaana la beegsanayaa goobaha ay khawaarijtu ku diyaarisay Qaraxyada sida barahooda Hoggaaminta, waxaana dhowaan lagu guuleystay howlgallo laga fuliyay degaanka Buulo-fulay oo Bay ka tirsan iyo Galhareeri, iyadoo halkaasi lagu baabi’yay waxyabaha qarxa oo ay halkaas ku diyaarinayeen” ayuu yiri Afhayeenka
Afhayeenka ayaa ugu baaqay shacabka in ay ka fogaadaan goobaha la tuhunsan yahay in ay joogaaan al-shabaab
