Saraakiisha af-gembiga kula wareegay talada dalka Niger ayaa qaaday tallaabooyin cusub oo xukunka ku difaacanayaan, waxa ayna gabi ahaan xireen hawada dalkaasi si aan weerar loogu soo qaadin.
War kasoo baxay hoggaamiyaasha milatariga ayaa lagu sheegay in la xiray hawada dalka Niger ilaa ammar dambe, waxaana arrintan looga hortagayaa hanjabaad iyo faragalin milatari oo ka timid dalalka dariska la ah Niger.
Afhayeen u hadlay militariga la wareegay talada Niger ayaa sheegay in ciidamada qalabka sida ay diyaar u yihiin inay difaacaan dalka, waxa uuna digniin u diray dalal uu sheegay in faragelin ku hayaan dalka Niger.
Dalalka kuyaalla Galbeedka Afrika ee ku bahoobay Ecowas ayaa ugu baaqay milatariga Niger in xukunka dib ugu celiyaan madaxweyne Maxamed Bazoum, haddii kale ay qaadi doonaan tallaabooyin milatari.
Gen Abdourahmane Tchiani, oo ahaa taliyaha ilaalada madaxtooyada Niger ayaa abaabulay af-gembiga ka dhacay Niger, waxa uuna jeneraalkan ku dhawaaqay in uu yahay hoggaamiyaha cusub ee la wareegay talada dalkaasi.
