Taliska ciidamada Maraykanka ee Afrika (AFRICOM) ayaa War saxaafadeed ay soo saareen ku sheegay in ay 2-dii bishan afar qof oo ay ku tilmaameen argagixiso ku dileen meel 74-km waqooyiga galbeed ka xigta magaalada Muqdisho.
War-Saxaafadeedka waxaa lagu sheegay in iyadoo la kaashanayo xukuumadda federaalka ee Soomaaliya ay ciidanka maraykanku qaadeen weerarkaas oo loo adeegsaday dayuurad aan duuliye laheyn.
Wuxuu war saxaafadeedku intaa ku daray in aysan jirin cid rayid ah oo wax ku noqotay balse warar aan weli la xaqiijin oo laga helayo deegaanno ka tirsan gobolka Sh/hoose waxay sheegayaan in dhowr qof oo rayid ah ay ku dhinteen weerarkan.
Weerarka ayey dadka deegaanku sheegeen inuu shalay gelinkii hore ka dhacay inta u dhaxaysa tuulooyinka Goobaale iyo Baladul-amiin ee gobolka Shabeellaha hoose, waxaana la sheegay in dadka dhintay ay wada saarnaayeen hal gaari oo gantaal lagu dhiftay.
Xafiiska Shabakada Allbanaadir.com
Muqdisho Somalia
Allbanaadir@live.com
