Wararka ka imaanaya degmada Boocame oo katirsan gobolka Sool ayaa sheegaya in halkaasi ay ka taagan tahay xiisad u dhaxeesa maamulada Somaliland iyo Puntland oo mid kastaahi sheegto in deegaanka maamulo.
Degmada Bocame waxaa gaaray wafdi uu hoggaaminayo Guddoomiyaha Gobolka Sool ugu magacaaban Somaliland Cabdikariin Aaden Xaaji Diiriye iyo ciidamo aad u tiro badan uu wato guddoomiyaha.
Waxaa sidoo kale degmada Boocame qeybo kamid ah ku sugan wafdi uu hoggaaminayo Wasiirka duulista Hawada iyo Garoomada Puntland Ilyaas Cismaan Lugatoor , waxaana wafdigan sidoo kale la socda ciidamo badan.
Dhaq dhaqaaqyo ciidan ay wadaan labada ciidan ee kala taabacsan maamulada Somaliland iyo Puntland ayaa laga dareemayaa Boocame , waxaana xaalada degmadaasi maanta yahay mid ka duwan sidii hore.
Maamulada Somaliland iyo Puntland ayaa isku haya gacan ku heynta iyo maamulida degmooytin iyo deegaano badan oo katirsan gobolada Sool iyo Sanaag, waxaana labada maamul mis kasta sheegtaa in goboladaasi katirsan yahay maamulkooda.
Xafiiska Shabakada Allbanaadir.com
Muqdisho Somalia
Allbanaadir@live.com
