Maalintii 3aad waxaa xarunta aqalka sare ee magaalada Muqdisho ka socota diiwaan-gelinta musharaxiinta u taagan doorashada madaxweynaha Somalia.
Dhowr musharax ayaa saaka qaatay shahaadada musharaxnimo, iyadoo diiwaangelintu weli socoto lana filayo iney Musharaxiin kale is diiwaan geliyaan.
Musharaxiinta saaka qaatay shahaadada waxaa ka mi ah Madaxweynaha Puntland Saciid C/llaahi Deni, isagoo noqonaya Madaxweynihii labaad oo Puntland xil ka haya oo xilka Madaxweynaha Soomaaliya isu sharaxa.
Sanadkii 2004 ayay aheyd markii  Madaxweynihii hore Marxuum C/llaahi Yuusuf oo xilligaas Madaxweyne ka ahaa Puntland uu isku sharaxay xilka Madaxweynaha Soomaaliya, kuna guuleystay doorashadii lagu qabtay Mbagathi ee dalka Kenya.
Sidoo kale musharaxiinta kala ah Sakariye Maxamuud Xaaji Cabdi iyo Maxamed Amiin Faarax ayaa qaatay shahaadada musharaxnimo ee madaxweynaha Somalia.
Galabta saacadu marka ay tahay afarta galabnimo ayaa la filayaa in la soo gebagebeeyo diiwaan gelinta musharaxiinta Madaxweynaha sida ay sheegeen guddiga labada aqal ee doorashada Madaxweynaha.
