Afhayeenka Ciidanka Booliska Soomaaliyeed Dhamme Sadiiq Aadan Cali (Doodishe) ayaa sheegay in Ciidamada Amniga ay gacanta ku dhigeen nin doonayay inuu isku qarxiyo dadkii maanta ka qeyb galay banaanbaxii Muqdisho ka dhacay.
Dhamme Sadiiq Aadan Cali (Doodishe) ayaa intaas ku daray in ninka oo xirnaa jaakadaha qarxa uu rabay inuu isku qarxiyo dibad baxayaasha, isagoo xusay in qalabkii uu isku qarxin rabay iyo isagiiba gacanta lagu hayo baaritaan uu ku socdo.
“Maanta oo ah 7-da bisha Juun sanadka 2020 abaare 10:00 am Ciidanka Hogaanka Baarista Dembiyada ee C. I. D-da ee Booliiska Soomaaliyeed, ayaa fashiliyay labo qarax oo kala ah nuuca gaadiidka lagu dhajiyo iyo Jaakada loo Isticmaalo in la isku qarxiyo, xili dhagar-qabayaashu ay rabeen inay maanta ku isticmaalaan, Ex-Control Afgooye iyo Ceelasha Biyaha” ayuu yiri Dhamme Sadiiq Aadan Cali (Doodishe).
Sidoo kale waxaa uu sheegay in wixii ku soo kordha baaritaanka ninkaas isku qarxin rabay banaan baxayaasha ay dib ka soo sheegi doonaan.
“Ciidanka ayaa gacanta ku dhigay miinooyinkii iyo dhagarqabayaashii watay iyadoo aysan wax qasaare ah geysan Waxaan Ummadda u balan qaadaynaa in Cadaalada la horgeyn doono” ayuu intaas ku daray afhayeenka.
Xafiiska Shabakada Allbanaadir.com
Muqdisho Somalia
Allbanaadir@live.com
