Ciidamo cusub oo ka tirsan Milateriga Soomaaliya ayaa la wareegay xerada tababarka Imaaraadka ee Jen. Gordan oo ku taalla degmada Hodan ee magaalada Muqdisho ka dib iska horimaad xeradaas ka dhacay.
Xaalada ayaa hadda degan, waxaana joogsatay rasaastii ka dhex socotay xeradaas oo ay dhowaan baneysay dowlada Imaaraadka, lamana oga illaa hadda khasaaraha ka dhashay iska horimaadka halkaas ka dhacay.
Ciidamadii uu tababarayey imaaraadka ayaa ka firxaday xerada, markii ay rasaastu bilaabatay waxaana qaarkood ay ka boodeen derbiga xeradaas iyagoo u baxsaday xaafada Zona Key oo xerada hareeraheeda ku taalla.
Ciidamada Xoogga dalka ee la wareegay xerada oo ku hubeysan gaadiidka dagaalka iyo kuwa gaashaaman ayaa la soo sheegayaa iney joogaan gudaha iyo hareeraha xeradan, welina ma jiro faahfaahin ku saabsan iska horimaadka halkaas ka dhacay oo ka soo baxay taliska ciidamada Xoogga.
Xafiiska Shabakada Allbanaadir.com
Muqdisho Somalia
Allbanaadir@live.com
