Diyaarado nuuca aan duuliyaha laheyn ayaa weerar xoogan sabtidii ku qaaday shirkado saliida soo saaro oo leedahay dowlada Sacuudiga, waxa ayna taasi dhalisay in uu yaraado wax soo saarka saliida Sacuudiga kala bar.
Weerarkan ayaa lagu tuhmayaa in ay ku lug leedahay dowlada Iiraan inkastoo ay beenisay, waxaana Sacuudiga iyo xulufadiisa Mareykanka kamid yahay weerarkaasi ku eedeeyeen Xukuumada Tahran.
Boqorka Sacuudiga, Salman Bin Abdulaziz ayaa sheegay in dalkiisa uu awoodo inuu iska difaaco wax uu ugu yeeray weeraradii fuleynimada ahaa ee lagu qaaday Warshada Saliida ee Sacuudiga.
Boqorka ayaa ugu baaqay beesha caalamka inay si cad u wajahaan kuwii ka dambeeyey weerarka saameeyay wax soo saarkii saliida Sacuudiga, waxa uuna Boqorka cadeeyay in dowladiisa ay ka jawaabi doonto gardarada.
Dowladda Sacuudiga ayaa ku celisay eedeynteeda ah in hubka Iran loo adeegsaday weerarka, hase yeeshee ma aysan yaboohin wax caddeymo ah oo taageereeya sheegashadeeda.
Madaxweynaha dalka Mareykanka Donald Trump ayaa weerarkan ku eedeeyay dowlada Iran , waxa uuna Trump shaaca ka qaaday inuu diyaar u yahay inuu caawiyo Sacuudiga oo xulufo muhiim la ah.
Weerarka lagu qaaday shirkadaha saliida Sacuudiga si aan horey loo arag sare ugu qaaday qiimaha saliidda caalamka, waxaana weerarkan hakiyey kala-bar wax soo saarkii saliida Boqortooyada Sacuudiga.
Xafiiska Shabakada Allbanaadir.com
Muqdisho Somalia
Allbanaadir@live.com
