Dowlada India ayaa shaacisay inay weerar dhanka cirka ah ku qaadday kooxo mintidiin ah oo ku sugan gudaha dalka Pakistan, iyadoo xiisada labada dal u dhexeysa ay haatan faraha ka sii baxeyso.
Wasiir katirsan Xukuumadda Hindiya ayaa sheegay in duqaymaha ay ku beegsadeen saldhig wax lagu tababaro oo ay leedahay kooxda Jaish-e-Mohammad oo ku yaal Balakot.
Pakistan oo ka carootay weerarkan ayaa sheegtay in duqaymahaas lala beegsaday deegaan cidlo ah, hase ahaatee waxay ballan ku qaadday inay jawaab ka bixinayso.
Xiriirka u dhexeeya labadan dal ee dariska ah ee hubka nuclear-ka haysta ayaa xumaaday tan iyo markii horraantii bishan weerar ismiidaamin ah lagu dilay 40 askari oo ka trisan ciidamada Hindiya.
Hindiya ayaa Pakistan ku eedaysay in ay kooxo mintidiin ah u oggolaatay dalkeeda si ay hawlgallo uga fuliyaan gudaha Hindiya.
Kooxda Jaish-e-Mohammad ayaa sheegtay in ciidamada ammaanka ee Pakistan ay kaalin ku lahaayeen weerarkii dhacay 14-kii bishaan February.
Duqaymihii dhanka cirka ee maanta ayaa ah kuwii ugu horreeyey ee lagu qaado dhulka Pakistan ay maamusho tan iyo sanadkii 1971-kii.
Xafiiska Shabakada Allbanaadir.com
Muqdisho Somalia
Allbanaadir@live.com
