Dhacdo xanuun badan ayaa laga soo sheegay magaalada Hargeysa, kadib markii askari ka tirsan Ciidamada Somaliland uu toogasho ku dilay xaaskiisa iyo gabadh yar oo uu dhalay.
Askariga ayaa sidoo kale dhaawac culus u geystay walaasha xaaskiisa (dumaashiidiisa).
Maydka iyo dhaawaca ayaa si degdeg ah loogu qaaday Cusbitaalka Guud ee Hargeysa, halkaasoo hadda lagu dabiibayo dumaashida dhaawacantay, halka labada ruux ee kale la xaqiijiyay geeridooda.
Ilaa hadda, laamaha amniga Somaliland wax faahfaahin rasmi ah kama bixin sababta ka dambeysay falkan foosha xun iyo in eedeysanaha gacanta lagu dhigay.
Dadka deegaanka oo ka argagaxay falkan ayaa si weyn u hadal haya arrintan, iyaga oo dalbanaya in cadaalad degdeg ah la helo.
