Ciidanka Hay’adda Sirdoonka iyo Nabadsugidda Qaranka ee NISA , ayaa fuliyay howlgal qorsheysan oo ka dhan ah maleeshiyaad ka tirsan kooxda Al Shabaab, waxa uuna howlgalka ka dhacay deegaanka Bagdaad ee duleedka Afgooye.
War kasoo baxay hay’adda NISA ayaa lagu sheegay in ciidanka heleen xogta xubno katirsan Al Shabaab oo abaabulayay arrimo amniga liddi ku ah, waxa ayna ciidanka xuseen in howlgalka lagu dilay 23 xubnood oo katirsan Al Shabaab.
NISA ayaa sidoo kale sheegtay in howlgalka intii uu socday lagu bur buriyay fariisimihii ay ku sugnaayeen maleeshiyaadka Al Shabaab, waxa ayna NISA ugu baaqday shacabka in ay ka fogaadaan goobaha ay joogaan Al Shabaab.
