Qarax aad u xoogan oon wali la ogeyn waxa uu yahay ayaa ruxay warshad ku taalla magaalladda Khorram Abad ee Gobalka Lorestan ee Galbeedka dalka Iran, gaar ahaan meel ku dhaw saldhig milatari.
Warar soo baxaya ayaa sheegaya in uu qaraxa ka dhacay meel ku dhow saldhigga Imaam Cali ee ciiddanka Ilaalada Kacaanka Iran, saldhigan ayaana xarun u ahaa warshad dhulka hoostiisa ku taalla oo lagu farsameeyo gantaallada iyo diyaaradaha Droneska.
Agaasimaha Guud ee Hay’adda Maaraynta Xasaradaha ee gobalka Lorestan oo la hadlay Telefishinka Qaranka Iran ayaa sheegay in waxa dhacay aysan fileyn in uu yahay dhul-gariir, waxa uuna tilmaamay in ay tuhmayaan in waxa dhacay uu yahay qarax.
Saraakiil katirsan dowladda Iran ayaa sheegay in ay socdaan baaritaanno ku aadan wax dhacay, waxa ayna xuseen in warbaahinta iyo bulshadaba dib kala wadaagi doonaan dhawaqa qaraxa la maqlay iyo waxa uu ahaa.
Warshadaha hubka dowladda Iran ayaa marar kala duwan lala beegsaday weeraro qorsheysan, mana cada hadda qaraxa la maqlay in uu ahaa weerar iyo in warshada gudaheeda qarax ka dhacay uu yahay.
