Xubnaha cusub ee dhawaan Madaxweynaha Jamhuuriyadda Federaalka Soomaaliya Mudane Xasan Sheekh Maxamuud u soo magacaabay Golaha Dhaqaalaha Qaranka ayaa maanta yeeshay kulankoodii ugu horreeyay oo rasmi ah.
Kulanka waxa shir guddoomiyay Agaasimaha Guud ee Golaha Dhaqaalaha Qaranka, ahna La-taliyaha Sare ee Dhaqaalaha ee Madaxweynaha JFS, Dr. Hassan Adan Hoosow, waxaana ujeeddadiisu ahayd isbarasho, maaraynta xaaladda kala-guurka ee hoggaanka Golaha iyo in la isla meel dhigo tallaabooyinka xiga ee lagu xoojinayo doorka Goluhu ka ciyaaro jihaynta iyo dejinta siyaasadda dhaqaalaha dalka.
Xubnaha cusub ayaa sidoo kale lafo-guray sidii loo dardargelin lahaa shaqooyinkii hore u socday iyo diyaarinta qorshayaal cusub oo ku qotoma aragtida Madaxweynaha Jamhuuriyadda Federaalka Soomaaliya ee ku aaddan koboca iyo horumarka dhaqaalaha dalka.
Agaasimaha Guud ee Golaha Dhaqaalaha Qaranka Mudane Dr. Xasan Aadam Hoosow ayaa xubnaha La-taliyayaasha Golaha ku boorriyay inay la yimaaddaan halabuur iyo hindisayaal cusub oo lagu horumarinayo dhaqaalaha qaranka, iyo inay xilkooda u gutaan si ay ku dheehan tahay hawlkarnimo, daacadnimo iyo isla-xisaabtan.
Xubnaha cusub ayaa dhankooda ballan-qaaday inay dardargelin doonaan shaqada Golaha iyo inay si joogto ah uga hawlgeli doonaan sidii loo jihayn lahaa koboca iyo horumarka dhaqaale ee Soomaaliya iyada oo loo marayo la-talin ku dhisan cilmi-baaris iyo aqoon dhaqaale.
Xafiiska Shabakada Allbanaadir.com
Muqdisho Somalia
Allbanaadir@live.com
