Sida uu qoray wargeyska Nation ee ka soo baxa dalka Kenya Mid ka mid ah labadii nin ee baxsadka ahaa ee uu Mareykanku ku raadjoogay loona haystay ka ganacsiga daroogada iyo ugaarsiga duurjoogta ayaa la xiray.
Badru Cabddicasiis Saalax ayaa laga soo qabtay deegaanka Liboi ee ismaamulka Garissa xili uu doonayay inuu u gudbo dhanka Soomaaliya, sida laga soo xigtay ilo ka tirsan booliska.
Qabashada ninkan ayaa ku soo beegmaysa afar maalmood ka dib markii Agaasinka Danbi baarista iyo Safaaradda Maraykanka ee Nairobi ay soo bandhigeen sawirkiisa, kaasoo si weyn loogu faafiyay warbaahinta.
Balse waxaa ay booliiska wali ku raadjoogaan, Cabdi Xuseen Hussein Axmed oo ay wada socdeen Saalax.
Dowlada Mareykanka ayaa ku dhawaaqay inay abaal-marin lacageed oo gaareysa hal milyan oo dollar ay siineyso ciddii keenta xog horseedi karta xarigga mid ka mid ah laba nin oo Kenyan ah.
