Wasiirka Gaashaandhiga Soomaaliya C/qaadir Maxamed Nuur (Jaamac) oo safar shaqo ku tagay dalka Qatar ayaa kulan gaar ah la qaatay Ra’iisul wasaare kuxigeenka dalka Qatar Khalid bin Mohammad Al Attiyah ahna wasiiru-dowlaha Wasaaradda Gaashaandhiga Qatar.
Kulankan dhax maray Wasiirka gaashaandhigga iyo Ra’isul Wasaare kuxigeenka Qatar ayaan laga bixin faah faahin badan, waxaana wakaaladda Wararka Sonna sheegtay in ay kawada hadleen xoojinta xiriirka iskaashi ee labada dalka gaar ahaan dhinaca difaaca.
Wararka aan heleyno ayaa sidoo kale sheegaya in kulankan looga hadlay sidii dowladda Qatar gacan uga geesan laheyd dib u dhiska ciidanka xoogga Soomaaliyeed iyo sidii uga taageeri laheyd agabka ciidanka ku howlgalaan.
Dowladdaha Soomaaliya iyo Qatar ayaa xiriir aad u dhaw leh, waxa ayna Qatar sannadihii ugu dambeeyay si weyn uga dhax muuqatay siyaasadda Soomaaliya, waxa ayna xiriir la leedahay Madaxweyne Farmaajo.
Xafiiska Shabakada Allbanaadir.com
Muqdisho Somalia
Allbanaadir@live.com
