Ciidamada booliiska ayaa saakay magaalada Muqdisho ku xiray Wariyaal tabinayay banaan bax ay dhigayeen qaar kamid ah darawalada magaalada Muqdisho oo ka cabanayay wadooyinka xiran iyo sidoo kale lacagaha canshuuraha ee laga qaado.
Sida aan wararka ku helnay ciidamo soo gaaray goobta banaan baxa ka socday oo aheyd Isgooska KM-4 ayaa halkaasi ka xir xiray ilaa shan Wariye oo la sheegay in ay tabinayeen warka ku saabsan banaan baxa.
Ciidamada booliiska ayaa wariyaasha ay xireen kala wareegay qalabkooda shaqada sida Kaamirooyinka iyo cod duubayaasha, waxaana wariyaasha la sheegay in wali gacanta ugu jiraan ciidamada booliiska.
Talaabadan lagu xiray wariyaasha ayaa u muuqata mid lagu doonayo in lagu qariyo banaan baxa cabashada ah ay dhigayaan darawalada gaadiidka PL-ka oo ka cabanaya wadooyinka xiran iyo canshuuraha laga qaado.
Banaan baxyada ay dhigayaan wadayaasha gaadiidka dadweynaha ayaana kusoo noq noqonaya magaalada Muqdisho, waxaana saakay dibad baxayaal careesan gaadiidkooda BL-ka ku xireen Isgooska KM-4.
Xafiiska Shabakada Allbanaadir.com
Muqdisho Somalia
Allbanaadir@live.com
