Madaxweynaha maamulka Somaliland oo safar shaqo ku jooga magaalada Nairobi, ayaa kulan muhiim ah la qaatay Gudoomiyaha Golaha Shacabka ee Dalka Kenya (Speaker of the National Assembly), Mudane Moses Masika Wetangula.
Kulankaasi waxa Madaxweynaha maamulka Somaliland ku wehelinayey xubno sare oo ka tirsan wefdigiisa, xildhibaano labada dhinac ka socday, iyo mas’uuliyiinta sare ee xafiiska maamulka Somaliland ka furatay magaalada Nairobi.
Kulankan waxa uu ku dhisnaa is-ixtiraam iyo aragti-wadaag. Qodobada ugu muhiimsan ee lagaga wadahadlay waxa ka mid ahaa:
1. Iskaashiga Baarlamaanada Kenya iyo kan maamulka Somaliland: In la helo dariiqooyin lagu xoojin karo xidhiidhka sharci-dejinta ee Somaliland iyo Kenya, iyadoo loo marayo wadahadallo, booqashooyin rasmi ah, is-weydaarsi aqooneed, iyo iskaashi hay’adeed.
2. Kor u qaadista hannaanka dimuqraadiga ah: Labada dhinac waxay isla qaateen muhiimadda ay leedahay wadaagista khibradaha ku saabsan dhaqan-galka dimuqraadiyadda, horumarinta hannaanka doorashooyinka, iyo korjoogteynta shaqada baarlamaanada.
3. Xasilloonida Gobolka iyo Horumarka: In la adkeeyo doorka ay Goleyaasha Sharci-dejintu ku leeyihiin nabadda, amniga, iyo horumarka waara ee guud ahaan gobolka Geeska Afrika.
4. Taageerada socdaalka dimuqraadiyadeed ee Somaliland: Madaxweynaha Somaliland waxa uu muujiyay farxaddiisa ku aaddan sida Kenya u fahansan tahay una garawsatay horumarka siyaasadeed iyo kan dimuqraadiyadeed ee ka hirgalay Somaliland.
Guddoomiyaha Golaha Shacabka ee dalka Kenya, Mudane Moses Wetang’ula, ayaa dhankiisa si diirran u soo dhaweeyay Madaxweynaha Somaliland iyo wefdigiisa.
Waxa uu si weyn u amaanay xasilloonida, nabadda, iyo dimuqraaddiyadda qaan-gaadhka ah ee ka hanaqaadday Somaliland. Waxa uu sidoo kale Madaxweynaha u xaqiijiyey in Golaha Shacabka ee Kenya uu diyaar u yahay in uu yeesho wada-shaqayn buuxda oo dhex marta Goleyaasha Sharci-dejinta ee Somaliland.
Sidoo kale, Guddoomiye Wetang’ula waxa uu caddeeyay in Golehiisu uu diyaar u yahay in uu hirgeliyo dhammaan tallaabooyinka iyo heshiisyada ay labada xukuumadood (Somaliland iyo Kenya) ku heshiiyaan.
Ugu dambeyntii, labada dhinac waxay si wadajir ah u qireen muhiimadda ay leedahay in Baarlamaanadu noqdaan aalad dublomaasiyadeed oo xooggan si loo sii xoojiyo is-fahanka, loona dhiso buundooyin iskaashi oo waara oo u dhexeeya labada dal.
Xafiiska Shabakada Allbanaadir.com
Muqdisho Somalia
Allbanaadir@live.com
