Kooxda Xuutiyiinta ee Yemen, oo taageero ka hesha Iran, ayaa si isa soo taraysa u kordhisay weerarada ay ka geysanayaan Badda Cas iyo Gacanka Cadmeed, iyagoo beegsada maraakiibta ganacsiga ee laga leeyahay waddamada reer Galbeedka, gaar ahaan kuwa la xiriira Israa’iil.
Tan iyo bishii Nofembar 2023, weerarradaasi waxay sababeen khasaarooyin isugu jira dhimasho, dhaawac, iyo burbur hantiyeed oo baaxad leh .
Xuutiyiinta ayaa sidoo kale hanjabaadyo u diray dalal ay ka mid yihiin Mareykanka, Ingiriiska, iyo xulafadooda, iyagoo sheegay inay bartilmaameedsan doonaan danahooda gobolka, sida saldhigyada milatari ee ku yaalla Jabuuti, Eritrea, iyo Soomaaliya waana khatar suurtagal ah oo ku wajahan ammaanka gobolka maadaama ay gantaalo ku weerareen Israel oo kumanaan meyl ka fog Yemen
Saameynta Soomaaliya:
Madaxweyne Xasan, wuxuu markii u horreysay shaaca ka qaaday inay Soomaaliya qeyb ka tahay isbahaysiga Carabta ee la-dagaallanka Xuutiyiinta oo ay hoggaamiyaan Sacuudiga iyo Imaaraadka Carabta.
Haddaba Soomaaliya, oo horey ula tacaaleysay dagaalka ka dhanka ah Al-Shabaab, ayaa wajahaysa caqabado amni iyo dhaqaale. Weerarada Xuutiyiinta ee ka dhanka ah maraakiibta ganacsiga waxay keeneen hoos u dhac ku yimid dhaqdhaqaaqa dekedaha, taasoo si toos ah u saameyneysa dhaqaalaha Soomaaliya. Sidoo kale, hanjabaadaha Xuutiyiinta ee ku wajahan saldhigyada milatari ee Soomaaliya waxay kordhinayaan walaaca laga qabo in dalka uu ku lug yeesho dagaallo dheeraad ah oo aan la xiriirin la dagaalanka Al-Shabaab.
Soomaaliya waxay ku jirtaa xaalad xasaasi ah, iyadoo dagaalka ka dhanka ah Al-Shabaab uu weli socdo. In dalka uu ku lug yeesho dagaallo kale oo gobolka ka socda waxay halis gelin kartaa dadaallada nabadeed iyo horumarka dalka. Sidaas darteed, waxaa muhiim ah in Soomaaliya ay ka fogaato ku lug lahaanshaha dagaallo kale, isla markaana ay diiradda saarto xasilinta gudaha iyo horumarinta dhaqaalaha.
