Wasiirka gaashaandhigga Israa’iil, Israel Katz, ayaa sheegay in milatariga ay ballaarin doonaan howlgalladooda Qasa, isla markaana ay qabsan doonaan “goobo waaweyn” oo ka tirsan dhulkaas, kuwaasoo uu ku tilmaamay “goobo amni”.
War qoraal ah oo uu soo saaray Arbacadii, Katz wuxuu ku sheegay in hawlgalka la balaariyay looga golleeyahay “burburinta iyo nadiifinta aagga argagixisada iyo kaabayaasha argagixisada”, wuxuuna u baahan doonaa buu yiri daadgureynta dadka Falastiiniyiinta ah.
Tani ayaa timid ka dib markii isbitaallada maxalliga ah ay sheegeen in ugu yaraan 15 falastiiniyiin ah lagu dilay dhulkaas xalay.
Waxaa jira warar dheeraad ah oo kasoo baxaya duqeymo dhanka cirka ah oo ay israa’iil ka geysatay xuduudka Masar, waxaana jirta cabsi ah in weerar cusub oo dhanka dhulka ah ay Israel ku soo qaadeyso Qasa.
Todobaadkan, milatariga Israa’iil ayaa ku baaqday in ugu yaraan 140,000 oo qof ay ka baxaan xaafadahooda oo ku yaala magaalada Rafax, iyagoo soo jeediyay goobo cusub oo ay dadku degaan oo ku yaala waqooyiga Qasa.
