Boqolaal ka tirsan Ciidanka daraawiishta Jubbaland ayaa ku biiray Ciidanka Xoogga Dalka ee ku sugan Beled xaawo sida ay sheegeen saraakiisha ciidamadaas oo ay soo bandhigtay dowlada Somalia.
Taliyaha horkacaya ciidankaas ayaa sheegay ineysan muddo dheer wax xuquuq ah ka helin Maamulka Jubbaland sidaas awgeedna ay go’aansadeen iney ku biiraan ciidanka xoogga dalka.
Hase ahaatee Wasiirka amniga gudaha Jubbaland sareeye Gaas Yusuf Xuseen Cismaan Dhumaal ayaa beeniyay wararka in Ciidamo Jubaland ka tirsan oo ku sugnaa Dagmada Baladxaawo Ee Gobolka Gedo ay isku dhiibeen DF
Qoraal kooban oo uu soo saaray Wasiirka Amniga Gudaha Jubbaland ayaa u qornaa sidatan
“Waxaan si cad u beeninayaa in aysan jirin ciidamado ka tirsan dowlada Jubbaland oo daraawiish ah oo ku sugan balad xawo arintaasoo ah mid lagu qaldayo dowlada federaalka iyo shacabka reer Gedo.
Ciidamado Jubbaland oo Darawiish ah waxaa u dambeysay kuwii uu dowlada faderaalka ku wareejiyay wasiirkii hore ee amniga Jubbaland Cabdirashid Xassan Cabdi Nuur.
Hadaba, saraakiisha dowlada ee kusugan gobolka gedo ee fashilan ee ciidanka nabadsugida, booliska iyo maleshiyaad ku soo ururiyay hadana dhahayo waa ciidamo Jubbaland ah oo ay rabaan in ay ku qaldaan shacabka reer gedo, waxaan wargalinaa dadka reer gedo in arintaasi ayanan wax ka jirin.
Saraakisha dowladana waxaan kula talinayaa shaqooyiinka dowlada ay u soo igmatay in ay ka shaqeyaan ayna ka dhex baxaan maamulada iyo canshuuraha Dowlada Jubbaland, Wixii ka yimaado arintaas wa mid ay masuliyadeedu qaadan donaan.
