Aabaha dhalay gabadhihii sida arxan-darada aheyd ninkeedii magaalada Muqdisho ugu gubay uguna dilay, ayaa uga mahad-celiyay dowladda Soomaaliya soo qabashada ninkii gacankudhiiglaha ahaa oo baxsad ku jiray.
Cabdicasiis Maxamed oo ahaa aabaha marxuumad Luul oo wali meydkeeda uu ku jiro filinjeer ayaa sheegay in ay ku faraxsan yihiin qoys ahaan soo qabashada ninkii dilay gabadhiisa, waxa uuna si gaar ah ugu mahad-celiyay ciidanka NISA .
Aabahan ayaana ka codsaday madaxda dalka gaar ahaan laamaha garsoorka in si deg deg ah ninka dilaaga ah loo horgeeyo caddaalada looguna fuliyo xukun dil ah oo qisaasta gabadhii uu dilay.
”Waxaan codsanayaa aniga oo ah Luul aabaheyd in ninkaasi caddaalada deg deg loo horgeeyo, waxa meydka aan loo duugin oo dib loogu dhigay waa in caddaalad heshaa marxuumadda,sida ugu dhaqsaha badan laamaha amniga iyo caddaaladda waxaan ka codsaneynaa in ninkaasi tiirka la geeyo oo lala duugo Luul” ayuu yiri aabbe Cabdicasiis.
Dowladda Soomaaliya ayaa dedaal badan ku bixisay soo qabashada ninka dilka geestay oo ka baxsaday Muqdisho, waxaana la filayaa in ninkaasi maanta Muqdisho la keeno si deg deg ah maxkamad loo saaro .
Xafiiska Shabakada Allbanaadir.com
Muqdisho Somalia
Allbanaadir@live.com
