Wiil dhalinyaro ah oo wata qori gacmeed ayaa rasaas ku furay gudaha suuq weyn oo laga dukaamaysto oo ku yaala bartamaha caasimadda Thailand galabnimadii maanta, isaga oo dilay ugu yaraan laba qof ka hor inta aan la qaban, sida ay masuuliyiintu sheegeen.
Booliska ayaa sheegay in wiilkan 14 sano jir ah xabsiga loo taxaabay wax ka yar saacad ka dib markii la sheegay in rasaastii ugu horeysay uu ku weeraray Siam Paragon Mall, oo ah mid ka mid ah meelaha ugu weyn ee laga dukaameysto ee Bangkok.
Muuqaal la soo galiyay baraha bulshada oo laga sii daayay taleefishinada ayaa muujinayay wiil dhalinyaro ah oo timo dheer oo ku jira gacanta booliska. taliyaha booliiska Torsak Sukvimol uu xaqiijiyay inuu yahay qof aan qaangaarin oo uu u muuqday in uu la ildaran yahay xanuunka dhimirka.
Eedeysanaha ayaa lagu soo waramayaa inuu yahay arday wax ka baranayay iskuul aan ka fogeyn xarunta ganacsiga. Lama oga sababta ka dambeysay weerarka.
Torsak waxa uu sheegay in laba qof la dilay oo kala ahaa nin u dhashay Shiinaha iyo mid u dhashay Myanmar. Goor sii horreysay, Yutthana Sretthan, oo ah maamulaha Xarunta Caafimaadka Degdegga ah ee Erawan ee Bangkok, ayaa sheegtay in saddex qof la dilay lix kalena la dhaawacay. Ma jirin wax sharraxaad ah oo ku saabsan farqiga, in kasta oo Yuthana uu markii dambe taageeray lambarka booliiska.
Afhayeenka booliiska Archayon Kraithong ayaa u sheegay warfidiyeenka in xaalada ay gacanta ku hayaan suuqan oo lagu iibiyo mootooyinka casriga ah iyo baabuurta raaxada, waxaana ka mid ah shineemo, aquarium iyo hoteelka shanta xidigle ee Siam Kempinski.
Ra’iisul Wasaare Srettha Thavisin ayaa u sheegtay wariyeyaasha in ay ku wargeliyeen booliska in mid ka mid ah dadka dhintay uu ahaa dalxiise Shiinees ah oo da’diisa lagu qiyaasay 30 sano jir.
“Waxaan jeclaan lahaa inaan taageero niyadda ah siiyo qoysaska dhammaan dadkii ku dhintay iyo kuwa dhaawacmay. ka dib toogashadii ka dhacday gudaha Siam Paragon,” ayey tiri RW Srettha
Rabshadaha hubaysan ee noocan ah iyo toogasho wadareedku ayaan looga baran dalka Thailand.
Toogashada ayaa mas’uuliyiinta ku kaliftay in ay si ku meel gaar ah u xidhaan gelitaanka goobta tareenka ee Siam Square ee u dhow, taasoo ka hor istaagtay rakaabka in ay baxaan iyada oo wakhtiga fiidnimo ay bilaabmeen roob xoog leh.
