Dagaal beeleed u dhaxeeya labo maleeshiyo beeleed oo kasoo kala jeeda Koonfurta degmada Galkacyo ee Galmudug iyo degmada Galdogob ee Puntland ayaa shalay ka dhacay deegaanno ku yaalla gobolka Mudug.
Sida aan wararka ku helnay dagaalkan ayaa dhaliyay khasaaro badan oo isugu jira dhimasho iyo dhaawac , waxaana wali jirta cabsi laga qabo in mar kale dagaalamaan labada maleeshiyo beeleed ee iska soo horjeeda.
Wasiirka qorsheynta maamul goboleedka Puntland Maxamed Saciid Faroole ayaa ku eedeeyay madaxweymaha Soomaaliya Xasan Sheekh Maxamuud uu ka dambeeyo dagaalka u dhaxeeya labada maleeshiyo beeleed.
Waxa uu tilmaamay wasiirka in wixii shalay ka dhacay deegaanno hoostaga degmada Goldogob oo ay sameeyeen waxa uu ku sheegay maleeshiyada Galmudug katimid ay bilaw u tahay dagaal seddexaad.
Hadalkan kasoo yeeray Puntland ayaa imaanaya xilli wali jiro khilaaf u dhaxeeya dowladda federaalkka Soomaaliya iyo Puntland, madaxweynaha Soomaaliya oo ay eedeesay Puntland ayaana Dhuusomareeb u jooga abaabulka dagaal ka dhan ah Al Shabaab.
