Al-Shabaab ayaa saaka weerar ku bilowday qaraxyo ismiidaamin ah ku qaaday Saldhig Ciidamada dowladda ku leeyihiin degaanka Geedweyne oo hoostaga degmada Doolow ee Gobolka Gedo.
Sida wararku sheegayaan Al-shabaab ayaa sida looga bartay waaberigii saaka gaadiid qaraxyo laga soo buuxiyey oo ay wadeen eag ismiidaamiyeyaal ah waxay ku weerareen xeradaas, waxaana ka dib xigay dagaal toos ah oo dhexmaray ciidamada dowlada ee xeradaas ku sugnaa iyo Al-shabaabkii weerarka soo qaaday.
Goob-joogayaal ku sugan degaanka Geed-weyne ayaa sheegay in dagaalku uu socday ku dhawaad saacad la iskuna adeegsaday hubka culus oo si weyn looga maqlay degaanada ku dhow halkaas.
Khasaaro dhimasho iyo dhaawac ah leh ayaa ka dhashay dagaalkaas inkastoo aan weli laga helin faahfaahin rasmi ah, rasaas goos goos ah ayaana weli laga maqlayaa degaanka Geed-weyne.
Saraakiisha Ciidamada xoogga dalka Soomaaliyeed ee Gobolka Gedo ayaan weli ka hadlin weerarkan saaka oo qeyb ka ah weeraro la mid ah oo Al-shabaab ay had iyo kula jarmaadaan xeryaha ciidamada DF.
