Dalka Kenya isbuucyadii lasoo dhaafay waxaa ka dhacay dibad-baxyo rabshado watay oo ay dhigayeen taageerayaasha xisbiga mucaaradka Kenya ugu weyn ee Azimio , waxaana dibad-baxa looga soo horjeeday hab maamulka madaxweyne Ruto iyo sicir bararka.
Dibad-baxyadii ugu dambeeyay oo dhacay isbuucii lasoo dhaafay ayaa sababay khasaarooyin isugu jira dhimasho iyo dhaawac , waxaa sidoo kale xabsiyada lagu guray tiro badan oo kamid ahaa dibad-baxayaasha.
Mucaaradka ugu weyn dalka Kenya ayaa sheegay in todobaadkaan ay ka nasanayaan mudaaharaadyo looga soo horjeedo sare ukaca maciishada , taas bedelkeedana ay sameyn doonaan feejignaan dadweyne oo lagu sharfayo dadkii lagu dilay dibadbaxyadii hore.
War kasoo baxay isbaheysiga Azimio ayaa lagu sheegay in dibad-baxyadii ugu dambeeyay ee dhacay lagu dilay dad gaaraya 50-qofood, sidoo kale ay jiraan boqolaal qof oo kale oo ku dhaawacmay dibad-baxyada.
Dibad-baxyadii ka dhacay dalka Kenya ayaa sababay in ay xirmaan goobaha ganacsi iyo sidoo kale goobaha waxbarashada, waxaa sidoo kale jira xarumo ganacsi oo lagu boobay dibad-baxyadii dhacay.
