Taliyaha Ciidanka Booliska Soomaaliyeed S/Gaas Cabdi Xasan Maxamed Xijaar iyo guud ahaan Ciidanka Booliska Soomaaliyeed waxa ay tacsi tiiraanyo leh u dirayaan ehelka iyo dhammaan Ummadda Soomaaliyeed ee uu ka dhintay S/Guuto Farxaan Maxamuud Aadan (Qaroole) oo ahaa Taliyihii Qeybta Guud ee Boliiska Gobolka Banaadir,
“Waxaanna Ilaahay u weydiinaynaa naxariistisii jano Sarreeyaha iyo shuhadadii la geeriyootay, sidoo kalena inta ku dhaawacantay in uu ilaahay u booga dhayo” ayuu yiri taliye Xijaar.
Afhayeenka Ciidanka Boliiska Soomaaliyeed G/lle Sadiiq Doodishe ayaa isna war kulul ka soo saaray qaraxii lagu dilay S/Guuto Shahiid Farxaan Maxamuud Aadan (Qaroole) kaasoo barqanimadii maanta ka dhacay degaanka Basra ee duleedka magaalada Muqdisho.
Ilaahay ha u naxariistee waxaa ku shahiiday howlgal lagula dagaalamayay khawaarijta saakay 11:30 am S/Guuto Shahiid Farxaan Maxamuud Aadan (Taliyihii Qeybta Guud ee Boliiska Gobolka Banaadir ee CBS)” ayuu yiri afhayeenka
G/lle Sadiiq Doodishe ayaa intaas ku daray in Howlgalkan uu ahaa mid ay Ciidamada Amaanku kaga sifeynayaleen Al-shabaab xuduuda deegaan ee Gobolada Banaadir, Shabeelaha Dhexe iyo Shabeelaha hoose.
“Waxaan ilaahay u weydiinaynaa naxariistisii jano sareeyaha iyo shuhaadadii la geeriyootay, sidoo kalana inta ku dhaawacantay ILAAHAY ha u booga dhayo, Argagixisada naf la caariga ahi, marnaba nagama weecin doonto hadafkeena ah xaqiijinta Amaanka Dalka iyo ciribtirka Argagaxisada” ayuu yiri G/lle Doodishe.
Xafiiska Shabakada Allbanaadir.com
Muqdisho Somalia
Allbanaadir@live.com
