Wasiirka cusub ee Wasaaradda Arrimaha Dibadda iyo Iskaashiga Caalamiga ah ee Xukuumadda Mudane Cabdisaciid Muuse Cali iyo Wasiir Ku-xigeenka Wasaaradda Mudane Maxamuud Cabdi Xasan Pekos ayaa Munaasabad ka dhacday Xarunta Guddoonka iyo Guddiyadda Golaha Shacabka ee Villa Hargaysa waxaa loogu dhaariyey xilka cusub ee Wasaaradda Arrimaha Dibadda.
Wasiirrada oo uu dhaariyey Hab-dhowraha Golaha Shacabka ee Baarlamaanka FS Xildhibaan Maxamed Cabdilaahi Xasan ayaa waxaa munaasabadda dhaarintooda ka qayb galay xubno ka tirsan Goleyaasha Dowladda ee Xukuumadda iyo Baarlamaanka.
Ka dib munaasabadda dhaarinta, Wasiirka iyo Wasiir Ku-xigeen Wasaaradda Arrinaha Dibadda ayaa booqasho iyo salaan ugu tegey Guddoomiyaha Golaha Shacabka ee Baarlamaanka FS Mudane Maxamed Mursal Sheekh Cabdiraxmaan, isaga oo guddoomiyuhu ugu hambalyeeyey Wasiiradda mas’uuliyadda qaran ee loo igmaday, una rajeeyey in Eebbe u fududeeyo gudashadeeda.
Ra’iisul Wasaare Maxamed Xuseen Rooble ayaa dhowaan u magacaabay Mudane Cabdisaciid Muuse Cali, Wasiirka Arrimaha Dibadda iyo Iskaashiga Caalamiga.
Wasiirka Arrimaha Dibadda Cabdisaciid Muuse Cali ayaa 25-ka bishan xilka kala wareegi doona Wasiirkii hore, Mudane Maxamed Cabdirisaaq Maxamuud.
Xafiiska Shabakada Allbanaadir.com
Muqdisho Somalia
Allbanaadir@live.com
