Rasaas ayaa laga maqlayay maanta oo dhan deegaanka Xananbuure oo qiyaastii 45km u jira magaalada Dhuusamareeb ee xarunta Galmudug halkaasoo tan iyo shalay ay ku dagaalamayeen maleeshiyo beeleedyo halkaas wada dega.
Ugu yaraan 9 qof ayaa ku dhintay dagaalka iyadoo dhaawacyo badana loo kala qaaday magaalooyinka Cadaado iyo Dhuusamareeb sida ay xaqiijinayaan ilo wareedyo lagu kalsoon yahay.
Illaa hadda lama oga sababta keentay dagaalkan u dambeeyey balse dhawr jeer oo hore ayay maleeshiyooyinka beelaha Saleebaan iyo Ceyr ku dagaalameen Xananbuure.
Ciidamada dawladda ayaa kala dhexagalay dagaalkii kan ka horeeyey oo dhacay bilo ka hor, waxaana labada beelood loo qabtay shirar lagu heshiisiinayo inkastoo kulamadaasi waxyaabihii lagu gaaray aan la fulin.
Xafiiska Shabakada Allbanaadir.com
Muqdisho Somalia
Allbanaadir@live.com
