Deni oo todoobaadyo ka dib ka soo laabtay safar dibeda ah & Qaliino uu maray (Sawirro)

Madaxweynaha Dowladda Puntland Mudane Siciid Cabdullaahi Deni iyo wafdi balaadhan oo uu hogaaminayo oo labo todobaad safar ugu maqnaa dalka dibaddiisa, gaar ahaan wadamada Itoobiya iyo Imaaraadka ayaa maanta dalka dib ugu soo laabtay.

Madaxweynaha waxaa soo dhoweeyey, Madaxweyne Ku-xigeenka Dowladda Puntland Mudane Axmed Cilmi Cismaan Karaash, Guddoomiye Ku-xigeenka Koowaad ee Baarlamaanka, Ahna Ku-simaha Guddoomiyaha Baarlamaanka Mudane Abuukaate Cabdcasiis Cabdullaahi Cismaan, Guddoomiye Ku-xigeenka Labaad ee Baarlamaanka Ismaaciil Maxamed Warsame, Xildhibaano ka tirsan Baarlamaanka, Wasiiro ka tirsan Xukuumadda, Saraakiil Ciidan, Maamulka Gobolka iyo Kan degmada Garoowe iyo qeybo ka mid ah bulshada.

Deni ayaa la sheegay in safarka uu ku joogay dalka imaaraadka uu la xiriiray dhinaca caafimaadka, waxaana isbitaal ku yaalla dalkaas loogu sameeyey qaliino fudud sida ay sheegayaan wararka laga helayo Madaxtooyada Puntland.

Af-hayeenka Madaxtooyada Dowladda Puntland Mudane Jaamac Dabaraani oo ka warbixiyey safarka Madaxweynaha ayaa sheegay in Madaxweynaha iyo wafdiga la socday ay maalmihii u dambeeyay safar ku joogeen wadamada Itoobiya iyo Imaaraadka, isla markaana ay booqashadu ugu soo dhammaatay guul.

Soo laabashada Madaxweynuhu waxay kusoo aaday iyadoo Puntland isu diyaarisay Shirka Maalgashiga Puntland oo loo muddeeyay (15-17) September 2019, Shirkan oo uu hore ugu dhawaaqay Madaxweyne Deni ayaa ah mid indhaha aduunka kusoo jeedinaya Puntland, waxaa ka qeybgeli doona Shirkado iyo Madax isaga imanaysa wadamo kala duwan, iyadoo ujeedku uu yahay in lasoo bandhigo fursadaha maalgashi ee ka jira Puntland.

Xafiiska Shabakada Allbanaadir.com
Muqdisho-Somalia

Allbanaadir@live.com