Booliska dowlada Somalia ayaa xabsiga dhigay xubin ka mid ah Guddigii qabanqaabada xil wareejinta Guddoomiyaha cusub ee gobolka Banaadir.
Wararka ayaa sheegaya in Taliyaha ciidamada Booliska G/Banaadir Saadaq Cumar Xasan (Saadaq Joon) uu xabsiga dhigay xubinta ka mid ahayd Guddiga Guddiga qabanqaabada Xil-wareejinta Gudoomiyaha Cusub ee Gobolka Banaadir oo magaciisa lagu sheegay Nuur Cali, kadib markii uu diiday amar la siiyey oo ahaa inuu ka baxo xarunta maamulka G/banaadir oo taliye Saadaq Joon uu sheegay inuu ka fulinayo howl amni.
Amarka Taliyaha Booliska G/Banaadir wuxuu yimid iyadoo uu shir uga socday xarunta G/Banaadir maamulka iyo Guddiga qabanqaabada xaflada xil wareejinta Guddoomiyaha cusub ee Gobolka, waxaana amarkiisa u hoggaansamay guddoomiye ku xigeenada Gobolka iyo xubnihii kale ee ku sugnaa xarunta.
Ninka uu xiray Taliye Saadaq Joon ayaa u muuqda in loo xiray amar diido, iyadoo xarunta Maamulka G/banaadir oo qarax is-miidaamin ka dhacay dhowaan amnigeeda la adkeynayo xilligan oo guddoomiyaha cusub uu dalbaday in wax laga bedelo xaalada amniga xaruntaas.
Xafiiska Shabakada Allbanaadir.com
Muqdisho Somalia
Allbanaadir@live.com
