Maamulka gobolka Banaadir ayaa digniin kasoo saaray maleeshiyaad hubeesan oo la sheegay in dhibaato ku hayaan qaar kamid ah shacabka ku dhaqan degmooyinka gobolka Banaadir.
Guddoomiyaha gobolka Banaadir ahna duqa magaalada Muqdisho Cabdiraxmaan Cismaan Cumar ayaa sheegay in ay jiraan shaqsiyaad hubeesan oo dhibaato ku haya shacabka Muqdisho, waxa uuna xusay in ay xeer ilaalinta u gudbiyeen dhibaatada kooxahaasi.
Waxa uu sheegay Duqa Muqdisho in lasoo gudbiyay cabasho ka dhan ah maleeshiyaad hubeesan oo dhibaato aan loo dulqaadan karin ku haya shacabka kunool degmooyinka Kaaraan iyo Dharkeenley.
”Waa dhamaatay waqtigii magaaladan cid qori wata maamulayeen, shacabka waxaan leeyahay haka cabsanina mooryaanta , gacan bir ah ayaana lagu qaban doonaa kooxahan hubeesan” ayuu yiri Duqa Muqdisho.
Maleeshiyaad hubeesan oo u abaabulan qaab beeleed ayaa dhibaato ku haya qaar kamid ah degmooyinka gobolka Banaadir, kooxahan ayaana ku hubeesan inta badan dareeska ciidanka dowlada.
