Madaxweynaha Somaliland, Mudane Cabdiraxmaan Maxamed Cabdilaahi (Cirro) iyo weftigii uu hoggaaminayey ee safarka shaqo ugu maqnaa dalka Kenya, ayaa maanta dalka dib ugu soo noqday.
Madaxweynaha iyo weftigiisa waxa Madaarka Cigaal International Airport ku soo dhaweeyey Madaxweyne Ku-xigeenka Somaliland Mudane Maxamed Cali Aw Cabdi, Wasiirro, Taliyeyaasha Ciidamada iyo Masuuliyiin kale.
Madaxweynaha iyo wefgigiisu markii ay dalka ku soo noqdeen, waxa Qasriga Madaxtooyada ku soo dhaweeyey, Shirguddoonka labada Aqal, Xildhibaanno, xubno kamid ah Golaha Wasiirrada, Madax-dhaqameed, Ganacsato, haween iyo mudan kale.
Madaxweynaha Jamhuuriyadda Somaliland, Mudane Cabdiraxmaan Maxamed Cabdilaahi (Cirro) oo la hadlay shacabka, ayaa hoosta ka xarriiqay in safarkii Nairobi ee ay martida ugu ahaayeen Madaxweynaha dalka Kenya, laga soo hooyey guul weyn oo Taariikhi ah, taas oo kor u qaadday meeqaamkii Somaliland, isla markaana ay heleen saaxad ay dunida inteeda kale ugu soo bandhigaan horumarka, Dawladnimada iyo Dimuqraaddiyadda ka hana qaadday Somaliland.
