Wararka naga soo gaaraya Magaalada Kismaayo ayaa sheegaya in ciidamo dheeraad ah oo ka tirsan kuwa Jubbaland la geeyay garoonka diyaaradaha magaaladaas
Ilo wareedyo waxay sheegayaan in la kordhiyay tirada askarta Jubbaland ee garoonka joogay sidoo kale gaadiid kale oo nooca dagaalka ah ayaa lagu xoojiyey amniga garoonka
Sidoo kale wararku waxay intaa ku darayaan in ciidamo dheeraad ah la dhigay wadooyinka qaar iyo xarumaha maamulka ee magaalada Kismaayo
Talaabadan ayaa timid markii ay soo baxeen warar sheegaya in dawladda Soomaaliya ay fartay ciidamada ATMIS inay la wareegaan amniga garoonka hase ahaatee ATMIS ay ka cudur daaratay.
Jubaland ayaa sheegay iney hakisay xiriirkii wada-shaqeyn ee xukuumadda federaalka Soomaaliya, xilli uu sii xoogeystay khilaafka labada dhinac.
Khilaafka, oo ku soo shaac baxay shirkii Golaha Wadatashiga Qaran ee uu horraantii October ka baxay Madaxweyaha Jubaland Axmed Madoobe, ayaa ka sii daray xalay kadib markii Axmed Madoobe uu magacaabay guddi doorasho oo ka kooban 7 xubnood.
Hase yeeshee, waxaa isla saacado gudahood ku gacan sayrtay wasaaradda arrimaha gudaha Soomaaliya oo ku tilmaamtay sharci-darro.
